കൊയിലാണ്ടി കൊല്ലം ചിറയിൽ കാണാതായയാളുടെ മൃതദേഹം കണ്ടെത്തി. തൈകണ്ടി തളയമ്പുനത്തിൽ കരുണൻ (പപ്പു) ആണ് മരിച്ചത്. ഇന്ന് രാവിലെയായിരുന്നു സംഭവം.
കൊല്ലം ചിറയിൽ കുളിക്കാനും, മീനുകൾക്ക് തീറ്റ കൊടുക്കാനുമായി പതിവായി എത്തുന്ന വ്യക്തിയാണ് കരുണൻ എന്ന് നാട്ടുകാർ പറഞ്ഞു. ഇന്ന് രാവിലെ ഇയാൾ ചിറയിൽ മുങ്ങിപ്പോകുന്നത് കണ്ട നാട്ടുകാർ ഉടൻതന്നെ കൊയിലാണ്ടി ഫയർ യൂണിറ്റിൽ വിവരമറിയിക്കുകയായിരുന്നു.
വിവരമറിഞ്ഞ ഉടൻ സ്ഥലത്തെത്തിയ കൊയിലാണ്ടി ഫയർ യൂണിറ്റും സ്കൂബ ടീമും പരിശോധന ആരംഭിച്ചു. ഫയർ ആൻഡ് റെസ്ക്യൂ ഓഫീസർ അനിൽകുമാറിന്റെ നേതൃത്വത്തിൽ രണ്ടു മണിക്കൂറോളം നടത്തിയ തിരച്ചിലിനൊടുവിലാണ് മൃതദേഹം കണ്ടെത്തിയത്.
കരയിലെത്തിച്ച മൃതദേഹം തുടർനടപടികൾക്കായി കോഴിക്കോട് മെഡിക്കൽ കോളേജ് മോർച്ചറിയിലേക്ക് മാറ്റി.
Post a Comment