കോഴിക്കോട്: സിപിഎമ്മിന്റെ ബഹുജന റാലിയോട് അനുബന്ധിച്ച് ഇന്ന് (സെപ്തംബർ 15, ചൊവ്വാഴ്ച) കോഴിക്കോട് നഗരത്തിൽ സിറ്റി പോലീസ് ഗതാഗത നിയന്ത്രണം ഏർപ്പെടുത്തി. വൈകുന്നേരം 3 മണി മുതൽ ആണ് നിയന്ത്രണങ്ങൾ നിലവിലുണ്ടാവുക.
പ്രധാന ഗതാഗത മാറ്റങ്ങൾ:
പൊതു വാഹനങ്ങൾ: എലത്തൂർ ഭാഗത്തുനിന്ന് വരുന്ന വാഹനങ്ങൾ വെങ്ങാലി ഓവർബ്രിഡ്ജ് കയറി വെസ്റ്റ് ഹിൽ ചുങ്കം വഴി നഗരത്തിലേക്ക് പ്രവേശിക്കണം.
ചരക്ക് വാഹനങ്ങൾ: വലിയ ചരക്ക് ലോറികളും കണ്ടെയ്നറുകളും വെങ്ങളം, പൂളാടിക്കുന്ന് ഹൈവേ വഴി തിരിഞ്ഞുപോകണം. ബീച്ച് ഭാഗത്തേക്ക് ചരക്ക് വാഹനങ്ങൾക്ക് പൂർണ നിരോധനമുണ്ട്.
റാലിക്ക് എത്തുന്ന വാഹനങ്ങളുടെ പാർക്കിങ് ക്രമീകരണം:
കണ്ണൂർ ഭാഗം: വെങ്ങാലിയിൽ നിന്ന് പുതിയാപ്പ-വെള്ളയിൽ ബീച്ച് റോഡ് വഴി ഗാന്ധി റോഡ് ജങ്ഷനിൽ ആളുകളെ ഇറക്കി ഭട്ട് റോഡ് പുതിയാപ്പ (നോർത്ത് ബീച്ച്) ഭാഗത്ത് പാർക്ക് ചെയ്യണം.
പേരാമ്പ്ര, കുറ്റ്യാടി, ബാലുശ്ശേരി ഭാഗം: എരഞ്ഞിപ്പാലം-നടക്കാവ് വഴി ക്രിസ്ത്യൻ കോളേജ് ജങ്ഷനിൽ നിന്ന് വലത്തോട്ട് തിരിഞ്ഞ് ഗാന്ധി റോഡ് ജങ്ഷൻ വഴി വെള്ളയിൽ ഹാർബറിൽ ആളുകളെ ഇറക്കി സരോവരത്തെ ട്രേഡ് സെന്ററിന് സമീപമുള്ള ഗ്രൗണ്ടിൽ പാർക്ക് ചെയ്യണം.
രാമനാട്ടുകര, ഫറോക്ക്, മീഞ്ചന്ത ഭാഗം: പുഷ്പ റോഡ് ജങ്ഷനിൽ നിന്ന് ഇടത്തോട്ട് തിരിഞ്ഞ് ഫ്രാൻസിസ് റോഡ് മേൽപാലം വഴി സീ ക്യൂൻ ഹോട്ടൽ ജങ്ഷനിൽ ആളുകളെ ഇറക്കി പാർക്ക് ചെയ്യണം.
സിറ്റി ഭാഗം: എരഞ്ഞിപ്പാലം-നടക്കാവ് വഴി ക്രിസ്ത്യൻ കോളേജ് ഈസ്റ്റ് ജങ്ഷനിൽ ആളുകളെ ഇറക്കി സരോവരം ജങ്ഷനിലുള്ള പീവീസ് ഗ്രൗണ്ടിൽ പാർക്ക് ചെയ്യണം.
വിമാനത്താവളം, റെയിൽവേ സ്റ്റേഷൻ എന്നിവിടങ്ങളിലേക്ക് പോകുന്ന യാത്രക്കാർ സമയനഷ്ടം ഒഴിവാക്കാൻ ഗതാഗത നിയന്ത്രണങ്ങൾ മുൻകൂട്ടി കണ്ട് യാത്രകൾ ക്രമീകരിക്കണമെന്ന് പോലീസ് അറിയിച്ചു.
പോലീസ് ഹെൽപ്പ് ലൈൻ നമ്പറുകൾ: 0495 2721017, 9497975656.
Post a Comment